ភ្នំពេញ៖ នៅថ្ងៃទី១៦​ ខែកញ្ញា ឆ្នាំ២០២៤ លោក​ សុក​ ហៃ​ មន្រ្តីសម្រុះសម្រួលដោះស្រាយវិវាទនៃ អ.ដ.ក.បានសម្រុះសម្រួលផ្សះផ្សាបញ្ចប់វិវាទមួយករណីទៀត ដែលពាក់ព័ន្ធនឹងកិច្ចសន្យាខ្ចីប្រាក់បានដោយជោគជ័យ។

សំណុំរឿងវិវាទនេះ កើតចេញពីការមិនអនុវត្តកាតព្វកិច្ចនៃកិច្ចសន្យាខ្ចីប្រាក់តាំងពីឆ្នាំ ២០២១​ មកម្ល៉េះ ដោយកន្លងមក គូភាគីបានព្យាយាមរកដំណោះស្រាយវិវាទ ប៉ុន្តែនៅតែមិនទទួលបានជោគជ័យ។ ករណីវិវាទខាងលើនេះ ភាគីម្ខាងបានដាក់ពាក្យមក អ.ដ.ក. ដើម្បីស្នើសុំសម្រុះសម្រួលផ្សះផ្សាវិវាទបញ្ចប់វិវាទ។

មន្រ្តី អ.ដ.ក. បានពិនិត្យ សិក្សា ស្រាវជ្រាវដោយយកចិត្តទុកដាក់ និងបានដោះស្រាយបញ្ចប់វិវាទនេះ ដោយផ្អែកលើឆន្ទៈព្រមព្រៀងរបស់គូភាគី និងដោយឆាប់រហ័ស។

ក្រោយទទួលបានសម្របសម្រួលពី អ.ដ.ក. គូភាគីវិវាទបានសះជាជាមួយគ្នា ហើយបានផ្តិតមេដៃលើកំណត់ហេតុព្រមព្រៀងបញ្ចប់វិវាទ ដែលផ្អែកតាមច្បាប់ កំណត់ហេតុនេះមានអានុភាពអនុវត្តដូចសាលក្រមស្ថាពររបស់តុលាការដែរ៕